Ta importante pa incorpora tratamentonan pa Salud Mental den pakete di AZV


E pandemia di COVID-19 a claramente subraya e deficiencianan y fayonan den e sistema di salud na Aruba, cu a bin ta existiendo un tempo caba. Partido MAS ta sali di e punto di bista cu pa tin un bon sistema di salud cu ta eficiente y efectivo, e continuidad di atencion urgente y atencion hospitalario mester wordo garantiza pa e por ta accesibel a largo plazo, dunando enfoke riba fortalece, y na su dado momento, reforma e sistema di atencion di salud. E esencia di nos programa di salud ta, pa tin lo basico bon regla y pa yega na acuerdonan den Reino pa reduci e gasto publico sin tin mester di mishi cu e calidad di cuido. E dos puntonan aki ta relaciona cu lo siguiente: Inverti den prevencion y educacion di salud den nos comunidad. Crea cuponan di trabou pa capacitacion di e profesionalnan di salud cu a finalisa nan estudio den e region; Cuido mester wordo fortifica y capacita door di incorpora mas personal medico y enfermeria den e sector medico; Inverti mas den infrastructura medicinal; Compra di medicamento, ekipo medico y material medico mester ta conhuntamente cu Hulanda y islanan den Reino; Establece un ekipo tecnico di enfermeria ambulante; Establece Institutonan di formacion den bario; Investiga e sistema educativo y hiba Educacion vocacional pa cuido di salud riba nivel adecua; Ehecucion di un plan di cooperacion entre hospitalnan den region Caribense di Reino y bin cu acuerdonan administrativo; Reduci lista di espera di hospital, di specialista y pa tratamento pa salud mental; Restructura cuido cronico pa hoben y anciano; Elimina nombracionan politico den hunta directiva y apunta personal capacita den posicionnan clave. Pa loke ta salud mental mester bisa cu na e momento aki tin por lo menos 7000 persona cu no ta hayando e ayudo profesional cu nan mester y cu nan tin derecho riba dje. Un enfoke riba salud mental ta importante paso hopi problemanan di salud tin di haber cu salud mental, entre otro problema den sector laboral. Miho cuido mental ta nifica menos presion riba cuido y menos problema den famia. Tambe miho cuido mental ta hisa productividad na trabou y aporta mas na economia di Aruba. Pa duna prioridad na salud mental y garantisa ayudo y tratamento psicologico Partido MAS lo: Aumenta capacidad di cuido y accesibilidad na cuido y promove efectividad; Incorpora salud mental den pakete di AZV; Capacita e POHs (Praktijk Ondersteuning Hulpverleners) riba area psicologico y psikiatrico. Aruba tin cu trata cu un cantidad relativamente grandi di delitonan di frontera, manera contrabando di droga, traficacion di persona, trafico di arma y labamento di placa. Banda di esaki, e conexion y relacion entre e mundo superior y baho mundo ta crea un menasa serio pa e funcionamiento di un Estado di Derecho. Esaki ta trece tur su consecuencianan pa e sociedad, e situacion real pa locual ta inversion y e forma con Reino ta wordo mira den mundo. Mirando cu den bista internacional Aruba ta na un paso di haya sancionnan ariba tereno di Human Traficking, lo reenforsa e departamentonan di Cuerpo Policial y instancianan cu tin di haber cu esaki y lo reorganisa y busca ayudo tecnico di afo pa asina asisti y traspasa nan conocemento na autoridadnan local. Relaciona cu esaki, Partido MAS tin como meta principal pa CONTRIBUI na e FORTIFICACION di Husticia, por medio di: Crea un inventario concreto den cada departamento di Husticia Ehecuta un maneho cu cifranan realistico riba personal, material y e situacion cu e personal ta trahando aden; Percura, pa tanto posicionnan di e werkvloer te cu e management di cada departamento, tin oportunidad pa estudio continuo riba midden y hoger kader, pa asina lanta e nivel y brinda posibilidad pa crecemento den e aparato di Husticia; Lo percura pa tur diensthoofd tin un “ Veiligheidsonderzoek” na ordo conforme nos leynan, di tal manera cu nos por brinda departamentonan di Husticia transparente y confiabel. Lo reenforsa y amplia e departamento di Jeugd en Zeden Politie pa asina no solamente traha ariba mas caso di abusonan di entre otro menor, pero pa por traha mas ariba e tereno preventivo. Lo centralisa y amplia Slachtofferhulp, cu actualmente ta conta cu solamente 2 persona pa ful Aruba, pa por opera ariba henter e isla y pa ta na disposicion di diferente departamentonan di gobierno. Slachtofferhulp lo haya un rol unda cu lo mantene e informacion central pa tin mihor bista riba e problematica na Aruba. Departamentonan manera Departamento di Asuntonan Social, Voogdijraad, Reclassering, Cuerpo Policial y otro partnernan lo mester traha hunto den esaki, pa asina tin mihor bista riba problemanan social.

 

Image