Marisol Lopez Tromp, Lider di MAS: Hunto nos por crea un Aruba Liber di Corupcion


Gobierno ta responsabel pa uza un gran parti di impuesto pa duna servicio y inverti bek den comunidad. Awe mas cu nunca ta importante pa combati corupcion y pa sigura cu gobierno duna servicio di un forma transparente y integro pa garantisa un recuperacion sostenibel, pa Aruba ta mas fuerte y stabil. Ta importante pa combati corupcion ya cu Corupcion ta causa desigualdad, pobresa y sufrimento pa gruponan vulnerabel. Corupcion ta afecta gobierno su responsabilidad pa duna servicio y inverti bek den comunidad. Corupcion ta aumenta gasto di haci negoshi. Corupcion ta kibra confiansa den gobierno, ta stroba crecemento economico y ta stroba productividad den sector publico y sector priva. Faboritismo politico a aumenta hopi den ultimo gobernacionan. Esaki a afecta e legitimidad di e organonan gubernamental y legitimidad di estado. Pa recupera di e pandemia y sigui e instruccionnan di “Caribisch Orgaan voor Hervorming en Ontwikkeling” (COHO) firma door di Gabinete Wever-Croes, Partido MAS lo duna atencion bek na balornan y integridad berdadero. Esakinan lo wordo integra den tur aspecto di gobernacion y maneho, asina brindando bek un oportunidad nobo pa traha den un forma husto y honesto na unda no ta malgasta placa y pues ganando bek e confiansa y respet di e ciudadano den gobernacion. Tambe lo pone enfasis riba leynan, structuranan y procesonan necesario a base di transparencia. Di e manera aki so por fortalece institucionnan, elimina burocracia, ineficiencia y corupcion pa por mehora finanzas publico structuralmente y calidad di bida pa tur. Pa un BON GOBERNACION, den un forma transparente cu lo yuda na COMBATI CORUPCION, Partido MAS lo enfoca pa: Investiga corupcion den aparato publico; Tin un maneho mas sistematico y coordina den gobierno cu ta respalda bon gobernacion y proyectonan realistico; Sigura cu tin legislacion y protocolnan necesario y adecuado pa organonan di sector publico por eherce nan funcion optimalmente; Procesonan den departamentonan wordo bon estableci y transparente; Desaroya programa di informacion pa sector priva pa educa y conscientisa riba e normanan di practicanan di bon gobernacion, primordialmente ley di comptabilidad; Aumenta capacidad di Institucionnan di supervision/controlaria gubernamental y promove coordinacion entre nan, pa tur por cumpli cu nan rol; Establece un defensor di pueblo “Ombudsman” y defensor di mucha “Kinderombudsman”; Duna prioridad, automatisa, fortalece y simplifica e sistema di impuesto, douane, polis, departamento di infrastructura “DIP”, departamento di obra publico “DOW” y proceso di destaho publico pa asina crea mas transparencia y facilita “accountability” pa e aparato gubernamental y empleado publico; Lo incorpora “Good Corporate Governance” como exigencia ora di nombracion den hunta di companianan estatal; Independisa Parlamento; Subsidio otorga na institutonan na Aruba mester ta mas transparente. Na e momentonan aki ainda Parlamento no a trata Presupuesto 2021. Cada aña prome cu september Parlamento mester ricibi e prespuepuesto di gobierno di e aña sigiente. Esaki ta segun ley y consecuentemente e mester cana su caminda y wordo trata prome cu fin di aña pa asina e presupuesto di e aña sigiente ta aproba y e departamentonan y ministernan por haci nan trabou y parlamento por controla gobierno. Na e momentonan aki pais Aruba no tin su Prespupuesto 2021 aproba. Ki consecuencia esaki tin? Cu departamentonan cu kier haci inversionnan, projectonan cu tin cu tuma lugar cu ta costa placa y caminda cu mester haci inversion manera den educacion, den e parti di salud, den e parti social di nos pais y den e parti di husticia, esakinan no por sosode. Esaki ta algo hopi iresponsabel y segun Lider di partido MAS Marisol Lopez Tromp, ta hopi importante pa Prome Minister di nos pais sali splica pakico ainda e presupuesto 2021 no ta poni riba agenda di Parlamento di Aruba y pakico Presidente di Parlamento te cu awor aki no a yama e reunion aki. E ta un acto iresponsabel y Marisol Lopez Tromp no por ni imagina cu gobierno lo kier hala esaki te cu despues di eleccion. Pakico hala e Presupuesto 2021 te despues di eleccion caminda cu tambe lo tuma su tempo pa Parlamento sinta y un eventual gobierno nobo forma y p'asina bai trata un presupuesto di cual ya caba mei aña di dje a pasa caba. Na e momentonan aki por bisa cu pa e departamentonan draai, nan por haci uzo di un tiki placa di begroting pero no por hinca placa den nada nobo cu tin cu wordo inverti den dje. Esaki ta bon gobernacion? Partido MAS kier pone hopi atencion riba prodceduranan manera esaki y ta kere cu Parlamento mester haya miembronan cu ta responsabel pa nos pais y cu ta trata e reunion aki na e momentonana aki paso nos pais mester di inversion y nos pais mester di gobernantenan responsabel y mester di parlamentarionan cu sa nan trabou. E presupuesto di un pais ta e ley di mas importante cu tin cu wordo trata y esaki mester a wordo inicia y haci na momento cu e aña aki a habri.

 

Image